म्याक्स टिभी एसइइ डान्स च्याम्पियनशिप आयोजना गर्ने
म्याक्स टिभी एसइइ डान्स च्याम्पियनशिप आयोजना हुने भएको छ । एसइइका विद्यार्थीहरुलाई ठूलो मञ्च र अवसर प्रदान गर्ने उद्देश्यले च्याम्पियनशिप आयोजना गर्न लागिएको बिहीबार आयोजित पत्रकार सम्मेलनमा जानकारी दिइएको हो ।
नृत्य मनोरञ्जनको साधन मात्र नभई शिप सहितको शिक्षा हो भन्ने सर्वब्यापी मान्यतालाई स्थापित गराउने उद्देश्यसहित कार्यक्रम गर्न लागिएको कार्यक्रमका परिकल्पनाकार महेश गोदारले जानकारी दिनुभयो । उहाँका अनुसार बैशाख १० गतेबाट २५ गतेसम्म देशका विभिन्न शहरमा अडिसन हुने र अडिसनबाट ६० जनालाई टिभी राउण्डमा ल्याइने छ ।
टिभी राउण्डमा आएका ति ६० जनालाई प्लस टु पढनका लागि शत प्रतिशत छात्रवृत्ति प्रदान गरिने गोदारले जानकारी दिनुभयो । कार्यक्रममा विजेतालाई नगद १ लाख रुपैयाँसहित स्कुटर प्रदान गरिनेछ । त्यस्तै उपविजेतालाई नगद ३० हजार, तृतियलाई नगद २० हजार रुपैयाँ प्रदान गरिने आयोजकले जनाएको छ ।
म्याम्स टिभिका महाप्रवन्धक दिनेश सुवेदीले अभिभावक र हाम्रो समाजमा नृत्य शिक्षा स्थापित गर्नका लागि सहकार्य गरिएको जानकारी दिनुभयो । कार्यक्रममा भोटिङ राउण्ड नहुने बताउँदै निष्पक्ष निर्णय हुने सुवेदीको दावी रहेको छ । कार्यक्रमको निर्णायक भूमिकामा कोरियोग्राफर गम्भिर विष्ट, नन्दा बस्याल र प्रेम श्रेष्ठ रहेका छन् ।
कार्यक्रममा नेपाल टेलिभिजनका महाप्रवन्धक गोविन्द रोका, राष्ट्रिय नाँचघरका महाप्रवन्धक राजेश थापा, वरिष्ठ नृत्य निर्देशक राजु शाह, कमल राई, भुवनदास श्रेष्ठ लगायतले शुभकामना दिएका थिए । एनटिभी प्लस र म्याक्स टिभी अन्तर्गत १० भन्दा बढी च्यानलबाट कार्यक्रम प्रशारण हुने पत्रकार सम्मेलनमा जानकारी गराइयो । अडिसन पोखरा,काठमाडौँ, धरान, बिर्तामोड, कोहलपुर, सुर्खेत, धनगढी, बुटवल, नारायणघाट, धादिंग, इलाम र बनेपामा हुनेछ ।