टिकापुर घटनामा रेशम चौधरी लगायत ११ जनालाई जन्मकैदको फैसला

जिल्ला अदालत कैलालीले टीकापुर घटनाका दोसी ठहर गर्दै राजपाका सांसद रेशम चौधरीलाई जन्मकैदको फैसला सुनाएको छ । अदालतको यो फैसला संगै कैदमा रहँदासम्म चौधरीको सांसद पद स्वतः खारेज भएको छ ।

न्यायाधीश परशुराम भट्टराईको एकल इजलासले चौधरीसहित ११ जनालाई दोषी ठहर गरेको हो । उनीहरुलाई जन्मकैदको फैसला भएको भएको छ । लक्ष्मण थारुलाई भने ३ वर्ष कैद सजाय सुनाएको छ । थारुले तीन वर्ष जेल बसिसकेकाले बुधबार नै रिहा भएको बताईएको छ ।

मधेसी–थारु आन्दोलनका क्रममा ७ भदौ २०७२ मा कैलालीको टीकापुरमा भएको हिंसात्मक झडपमा नेपाल प्रहरीका एसएसपीसहित ८ जनाको मृत्यु भएको थियो ।

घटनापछि फरार भएका चौधरी कैलाली १ मा राजपाबाट प्रतिनिधिसभा सदस्यको चुनाव जितेका थिए । वारेस मार्फत चुनाव जितेको प्रमाणपत्र लिन पाउनुपर्ने माग गर्दै सर्वोच्च अदालतसम्म गएका चौधरीले मुद्दा हारेपछि १४ फागुन २०७४ मा जिल्ला अदालत कैलालली सामू आत्मसमर्पण गरेका थिए ।

तर, जेलमै रहेका बेला १९ पुस २०७५ मा सरकारकै जोडबलमा चौधरीले सांसदको सपथ ग्रहण गरेका थिए । सपथपछि पनि चौधरी डिल्ली बजारस्थित कारागारमा छन् ।