बिजुली बिक्रीबाट १२ अर्ब ३३ करोड नाफा, अघिल्लाे वर्षभन्दा किन घट्याे नाफा ?
नेपाल विद्युत प्राधिकरणले आर्थिक वर्ष २०७९/८० मा १२ अर्ब ३३ कराेड नाफा कमाएकाे छ । याे अघिल्लाे वर्षकाे तुलनामा १ अर्ब ४ कराेडले कम हाे ।
नाफामा गिरावट आउनुमा विद्युत उत्पादनमा कमी भएकाले प्राधिकरणकाे दावी छ । २०७९/८० मा सुख्खायामको समय बढेर खोला तथा नदीनालामा पानीको बहाव घट्दा विद्युत उत्पादनमा कमी आएको प्राधिकरणका प्रमुख कुलमान घिसिङको भनाइ छ।
पानीकाे बहाव घट्दा प्राधिकरण र निजी क्षेत्रका जलविद्युत केन्द्रहरूको विद्युत उत्पादनमा ह्रास आएकाे तथा आन्तरिक माग धान्न विद्युत आयात केही मात्रामा बढ्दा नाफा प्रभावित भएको उहाँकाे भनाइ थियाे ।
प्राधिकरणले विद्युत बिक्री र अन्यबाट गर्ने आम्दानी दुई वर्षअघिको तुलनामा भने बढेको जनाएको छ। यस्तो आम्दानी दुई वर्षअघिको तुलनामा ८१ अर्ब रूपैयाँ थियो। प्राधिकरणका अनुसार अहिले बढेर एक अर्ब १८ अर्ब पुगेको छ ।
त्यस्तै नेपाल ले आर्थिक वर्ष २०७९/८० मा भारतलाई १० अर्ब ४५ करोड रूपैयाँको बिजुली बिक्री गरेको छ भने १९ अर्ब ४४ करोड रूपैयाँको बिजुली भारतसँग किनेको छ। बिजुलीकाे व्यापारमा ८ अर्ब ९९ करोड रूपैयाँ व्यापार घाटा देखिएको छ।
नेपालले पहिलो पटक नोभेम्बर २०२१ देखि ३९ मेगावाट विद्युत भारत निर्यात सुरू गरेको हो। हाल करिब ४५० मेगावाट विद्युत निर्यात भइरहेको छ।