प्रतिनिधिसभा बैठकः सभामुख चयन हुने
संघीय संसद अन्तर्गत पतिनिधिसभाकाे बैठक आज बस्दैछ । आज बिहीबार बिहान ११ बजे बस्ने बैठकमा सभामुख चयनकाे कार्यतालिका तय भएकाे छ ।
संघीय संसद सचिवालयका अनुसार बिहीबार बिहान ११ बजे बस्ने बैठकमा सभामुख चयनका लागि मतदानसम्बन्धी प्रक्रिया अघि बढ्नेछ।
बुधबार नै सत्ता साझेदार दलहरूको समर्थनमा नेकपा एमालेका सांसद देवराज घिमिरे र नेपाली कांग्रेस तथा नेकपा एकीकृत समाजवादी लगायत दलहरूको समर्थनमा कांग्रेस सांसद ईश्वरीदेवी न्यौपानेकाे उम्मेदवारी दर्ता भइसकेकाे छ ।
प्रतिनिधि सभा सदस्यहरूले आफूमध्येबाट सभामुख चयन गर्ने व्यवस्था छ। अहिले सभामुख नभएका बेला ज्येष्ठ सदस्य राप्रपाका सांसद पशुपतिशम्शेर जबराले सभामुखको भूमिका निर्वाह गरिरहनुभएकाे छ ।
एमालेका सांसद घिमिरेलाई एमालेसहित माओवादी, राष्ट्रिय स्वतन्त्र पार्टी, राप्रपालगायत दलहरूको साथ छ। प्रतिनिधि सभामा एमालेका ७९, माओवादीका ३२, रास्वपाका २० र राप्रपाका १४ जना सांसद छन्। सत्ता साझेदार अन्य दलहरूले पनि घिमिरेलाई साथ दिने सम्भावना छ।
२७५ सदस्यीय प्रतिनिधि सभामा बहुमतका लागि १३८ जना सांसदको समर्थन पाएमा सभामुख चयन हुनेछन्।