तमु समुदायमा ल्हाेसार मनाइँदै

तमु (गुरूङ) समुदायले पुरानो वर्षलाई बिदाइ गरी नयाँ वर्षलाई स्वागत गरेर ल्हाेसार मनाउँदैछन् । हरेक वर्ष पुस १५ का दिन तमु समुदायले ल्हाेसार पर्व मनाउने गर्दछन् ।

आज आइतबार ‘तमु ल्होसार’ पर्वका अवसरमा सार्वजनिक विदा दिइएकाे छ । ‘ल्हो’ को अर्थ वर्ष र ‘सार’ को अर्थ फेरिनु भएकाले वर्ष फेरिने दिनलाई ‘तमु ल्होसार’ भनिएको हो।

तमु ल्होसारलाई गुरूङ समुदायले नयाँ वर्षका रूपमा भव्यरूपमा मनाउँने प्रचलन छ । नेपालमा मात्र नभइ विदेशमा रहेका तमु समुदायले समेत यस पर्वका अवसरमा मनाेरञ्जनका साथ विभिन्न कार्यक्रम गरी मनाउन्छन ।

‘तमु ल्होसार’ पर्व सूर्यको किरणसँग सम्बन्धित छ। गुरूङ बाहुल्य रहेको लमजुङ, गोरखा, तनहुँ, स्याङ्जा, मनाङ, कास्की, पर्वतलगायत जिल्लामा सूर्यको ताप पहिले आउने भएकाले पुस १५ मा यो पर्व मनाउने गरिएको हो।

यसपछि क्रमशः तामाङ र शेर्पा जातिको बसोबास भएको क्षेत्रमा सूर्यको ताप आउने भएकाले माघ र फागुनमा यो पर्व मनाइने विश्वास गरिन्छ।

पुस १५ गतेको रात सबैभन्दा लामो हुने र यसपछिका रात घट्दै जाने भएकाले पनि यस पर्वको महत्त्व रहेको बताइन्छ। तमु ल्होसारका अवसरमा आज सरकारले सार्वजनिक बिदा दिएको छ।

यस अवसरमा टुँडिखेलमा गुरुङ समुदायले विशेष कार्यक्रमको आयोजना गरेका छन् । कार्यक्रममा गुरुङ समुदायका मानिस परम्परागत एवं सांस्कृतिक वेशभूषामा सजिएर सहभागी हुनेछन् भने गुरूङ समुदायमा प्रचलित विभिन्न परिकार विशेषको समेत प्रदर्शनी गरिने छ।