गोठाटारमा आगलागीबाट १४ वटा सटरहरूमा क्षति
काठमाडौँको गोकर्णेश्वर नगरपालिका वडा नं. ५ गोठाटारस्थित पहेँलो पुल नजिकै गएराति भीषण आगलागी भएको छ । रविन्द्र भट्टराईले सञ्चालन गरेको काठको गोदाम र सटरहरूमा विद्युत सर्ट (करेन्ट सर्ट) भई आगलागी भएको हो ।
राति करिब ९:१५ बजे सुरु भएको आगो झण्डै दुई घण्टापछि राति ११:०० बजे पूर्ण रूपमा नियन्त्रणमा आएको थियो । आगलागी नियन्त्रणका लागि नेपाल प्रहरी, सशस्त्र प्रहरी र स्थानीय बासिन्दाको ठूलो टोली परिचालन गरिएको थियो ।
आगो निभाउन ९ वटा दमकल र ३ वटा पानी ट्याङ्करको प्रयोग गरिएको प्रहरी वृत्त बौद्धले जनाएको छ ।
आगो निभाउने क्रममा कागेश्वरी मनोहरा नगरपालिका वडा नं. ९ गोठाटार निवासी ३७ वर्षीय नरेश थापा घाइते भएपछि उपचारका लागि राष्ट्रिय ट्रमा सेन्टर राखिएकाे छ ।
प्रहरीका अनुसार आगलागीबाट १४ वटा विभिन्न व्यवसाय सञ्चालित सटरहरूमा क्षति पुगेको छ ।
ओम काष्ठ मिल उद्योग, रिकन्डिसन एण्ड हेल्मेट पसल, बासु फर्निचर पसल, घिसिङ अटो रिकन्डिसन, रङ पसल, प्रेम गौतम रिकन्डिसन, मोबाइल पसल, हार्डवेयर पसल, मिठाई पसल, चिया पसल, हिमेस गौतमको फर्निचर पसल, चटपटे एण्ड किराना पसल, कस्मेटिक पसल र स्टेशनरी पसलमा क्षति पुगेकाे हाे ।