एनपीएल : काठमाडौं र लुम्बिनी भिड्दै, शुक्रबार सुदूरपश्चिम रोयल्स र चितवन राइनोज विजयी

नेपाल प्रिमियर लिग (एनपीएल) क्रिकेटअन्तर्गत आज शनिबार काठमाडौं गोर्खाज र लुम्बिनी लायन्सबीच प्रतिस्पर्धा हुँदैछ। कीर्तिपुरस्थित त्रिवि अन्तर्राष्ट्रिय क्रिकेट मैदानमा हुने खेल साँझ ५ बजे सुरु हुनेछ।

यसअघि शुक्रबार भएका खेलमा सुदूरपश्चिम रोयल्स र चितवन राइनोज विजयी भएका छन्।

पहिलो खेलमा सुदूरपश्चिम रोयल्सले कर्णाली याक्सलाई ३९ रनले पराजित गर्‍यो। सुदूरपश्चिमले दिएको १७७ रनको लक्ष्य पछ्याएको कर्णालीले २० ओभरमा ७ विकेट गुमाउँदै १३७ रन मात्र बनाउन सक्यो।

त्यस्तै, दोस्रो खेलमा चितवन राइनोजले पोखरा एभेन्जर्सलाई ३० रनले हरायो। चितवनले दिएको १५२ रनको लक्ष्य पछ्याएको पोखरा १९ ओभरमा १२१ रनमा अलआउट भयो।